北角油街實現藝術空間嘅重點展覽「黃金之境」今日係最後一日！仲可以順便睇埋「像極了花園」機械森林同「來自香港的愛」懷舊展，三個展都係免費免預約，吸引超多人趕尾班車去打卡。「黃金之境」最大亮點係《黃金茶室》，用白砂同金箔屏風打造出日式枯山水庭園，入面213幅手繪金箔畫暗藏香港特色元素，從電車、菠蘿包到舞火龍同海鮮檔，連油街種嘅青瓜都入畫，好有本地情懷。「像極了花園」喺油街倉庫2，有《人參呼吸機》同《洋蔥眼睛屋》等得意裝置，全部靈感嚟自油街園圃真實物種，例如石榴花變身成《糖衣陷阱》機械花，識得跟住人嘅動作開合，互動感十足。懷舊迷就要去倉庫1睇「來自香港的愛」，重現80年代TVB場景同經典生活場景，例如士多、舊式涼茶舖，仲有經典劇集道具展出。呢度本身係二級歷史建築，1908年曾經係海邊遊艇會，紅磚牆瓦頂好有風味，行完仲可以順便去埋附近嘅炮台山站景點。